Dominant.Az - Şəhid Rüstəm Eminlinin xatirəsi yad edildi

Şəhid Rüstəm Eminlinin xatirəsi yad edildi - FOTOLAR

15 Martt 2025 16:19 1017 Baxış

2025-03-15 16:19:08

Deyərlər ki, quş yuvasına, insan obasına qayıdanda bayram olar. Yollar həm ayırandı, həm qovuşduran. Həm həsrət soraqlıdır, həm vüsal haraylı. Doğma ata ocağına aparan yollar, həm də yolların şahıdır.

Ata ocağım Yardımlı. Tərtəmiz uşaqlıq xəyallarım, bitmək bilməyən şirin nağıllarım, Yardımlı. Ana torpaq! Babaların əmanəti, igidlərin dəyanəti, gəlinlərin ləyaqəti, anaların sədaqəti. Dünən həm ata yurduna, həm də igid oğlumuz, şəhid balamız Rüstəm Eminlinin “görüşünə" tələsirdik. Rüstəmin doğulduğu və təhsil aldığı Horonu kənd orta məktəbində şəhidin əziz xatirəsinə tədbir düzənlənmişdi həmin gün. Yol yoldaşım elimizin dəyərli oğlu, iş adamı, xeyriyyəçi tədbirin təşkilində və keçirilməsində böyük əməyi olan, Yardımlı Xeyriyyə Cəmiyyətinin üzvü Bəylər Əzizov idi.

Vətən övladının ən müqəddəs və ali məqsədi Vətən uğrunda şəhid olmaqdır. Yardımlıda doğulan, bir ailədən qopan neçə-neçə igid oğullarımız Vətənin oğulları oldular, ölməzlik qazandılar. Çünki şəhidlik qəhrəmanlıq yoludur. Görə-görə, bilə-bilə ölumə getmək yoludur. Şəhidlik ölüm deyil, ölməzlikdir.

Yardımlının belə oğullarından biri də Rüstəm Eminlidir. Sən Şuşa uğrunda döyüşlərdə canını fəda etdin. Qanınla Vətən yazdın. Sən bu xalqın yaddaşında qalacaqsan, daim yaşayacaqsan. Sənə and içəcəklər, önündə diz çökəcəklər. Allah yanında ən gözəl məkanın sahibisən. Hər kəsin arzuladığı, amma sahib ola bilməyəcəyi məkanın…

Şəhidin adına layiq bir tədbir keçirildi. Sinif otaqlarının biri Rüstəm Eminlinin adını daşıyır. Sinif otağında şəhidin baralyefi asılmış, döyüş yollarını əks etdirənn böyük foto- güşə hazırlanmışdır.

Mart günəşinin ilıq təbəssümü altında tədbir açıq havada, məktəbin həyətində keçirildi. Məktəbin müəllim və şagirdləri, Bakıdan, Sumqayıtdan, qonşu kəndlərdən gələn qonaqlar, kənd sakinləri çıxışlar etdilər. Şəhid haqqında xatirələrini və ürək sözlərini söylədilər. Məktəblilərin Vətən və şəhidlər haqqında söylədikləri şeirlər tədbiri daha da məzmunlu etdi.

Şəhid ailəsi adından çıxış edən Şeymur Emınlı tədbirin təşkili və keçirilməsində böyük əməyi olan Bəylər müəllimə, gənclərimiz Elşad Mirağaoğluna, İnqilab Məmmədova və bütün tədbir iştirakçılarına minnətdarlığını bildirdi. Tədbir ağsaqqalların, kənd camaatının, gənclərin, müəllim və şagirdlərin birliyinin ən gözəl nümunəsi idi.

Sonra şəhidin məzarı ziyarət edildi. Dualar oxundu.

Kəndin imkansız və kimsəsiz ailələri də unudulmamışdı. Onlara da bayram sovqatı paylandı. Hamı tədbirdən razı qalmışdı. Bu tədbir bir daha göstərdi ki, " bu xalqı qırmaq olar, əzmək olar, sındırmaq olmaz" ( İ.Əliyev).

Şəhidi olmayan xalq torpağa məhəbbətdən, yurd sevgisindən danışa bilməz. Qarabağ uğrunda döyüşlərdə ordumuzun qələbəsi özünə inamıdır. Xalqın doğrulan gümanıdır. Doğru, düzgün siyasətin davamıdır.

Mehman Mayılxanlı