Rafael Hüseynov Hacıqabulda seçicilərlə görüşüb

Dominant.az xəbər verir ki, avqustun 13-də Hacıqabul şəhər Mədəniyyət Mərkəzində deputatlığa namizəd və son beş çağırışda Azərbaycan Milli Məclisinin üzvü Rafael Hüseynovla görüş keçirilib.

Şəhər ictimaiyyətinun 300-dən artıq nümayəndəsinin toplaşdığı tədbirin əvvəlində Rafael Hüseynov auditoriyaya müraciətlə bildirib ki, bu salonda əvvəllər də dönə-dönə çıxış etsə, o cümlədən Milli Məclisə seçkilərlə bağlı xeyli görüşlərə qatılsa da, bu dəfəki görüş və qarşıdakı seçkilər bütün əvvəlkilərdən mahiyyətcə büsbütün fərqlənir. Çünki indiki parlament seçkiləri Azərbaycanın ərazi bütövlüyünün bərpa edilmiş olduğu, 30 ilə yaxın müddətdə işğal altında saxlanmış, indi azadlığına qovuşmuş torpaqlarda bayrağımızın yüksəldiyi, o ərazilərdə və bütün ölkədə möhtəşəm quruculuq işlərinin getdiyi şəraitdə baş tutur.

Rafael Hüseynov Hacıqabulun inkişafı ilə bağlı son illərdə görülmüş genişmiqyaslı işlərdən və həllini gözləyən problemlərdən söz açıb, Milli Məclisin üzvü olaraq Hacıqabulun səsinin lazımi ünvanlara çatmasında, qaldırılan məsələlərin həllində göstərdiyi səylərdən bəhs edib.

Daha sonra Rafael Hüseynov görüşə toplaşanların çoxsaylı suallarını cavablandırıb.

Görüş bitdikdən sonra da ayrı-ayrı şəhər sakinləri xahiş və istəkləri ilə Rafael Hüseynova müraciət edib, bununla bağlı da geniş müzakirələr aparılıb.

Səmimiyyət şəraitində keçən görüş 2 saatdan artıq davam edib.